Jesus Krist, du nådens kjelda, Jesus Krist, du livsens ljos!

Vers 1

Jesus Krist, du nådens kjelda, Jesus Krist, du livsens ljos! Lat di gjerning for meg gjelda, Ver mi rettferd og mi ros! Når mitt samvit vil meg saka, Og eg må Guds vreide smaka, Lær meg trygt å tru ditt ord, At eg er rettferdiggjord!

Vers 2

Når meg verdi vil misunna Og vil røva meg din fred, Milde Jesus, meg miskunna! Slå all tvil og tvihug ned! Lat mitt hjarta aldri missa Denne sæle von og vissa At du med ditt dyre blod For mi synd har sagt deg god!

Vers 3

Og når Satan vil meg styggja Bort ifrå din nådestol Og med mine synder skyggja For di klåre nådesol, Må du meg i trui tryggja, Så eg kan på Ordet byggja. Du har heile Satans makt Under dine føter lagt.

Vers 4

Jesus Krist, du nådens kjelda, Jesus Krist, du livsens brunn! Kom til meg når det vil kvelda, Styrk meg i mi siste stund! Når eg skal for domen møta, Lat di gjerning for meg bøta, Så eg ved di rettferd må Evig liv av nåde få.